اُس رات آسمان پہ تارے تھے اِس قدر
اُس رات آسمان پہ تارے تھے اِس قدر
دُشوار ھو رھا تھا سفر ماہتاب کا
آنکھوں میں جھلملاتے ھُوئے آنسوؤں کے پار
انگڑائی لے کے پھیل رھا تھا، چہار سُو
اِک بے کنار ھجر کا دشتِ چمن نما،
اَٹکی ھُوئی تھی نخلِ تمنا کی شاخ پر
فصلِ پریدہ رنگ کی مَسلی ھُوئی قبا
اِک اجنبی دُعا
کِھلنے لگے تھے دستِ ھوا پر خزاں کے پُھول
جاتی ھُوئی بہار کے ٹوُٹے ھُوئے اصُول
چہرہ ازل کی آگ تھا، آنکھیں ابد کی دُھول
اُس رات ٹوُٹتے ھُوئے تاروں کی گوُنج میں
ھم کتنی دیر چلتے رھے، کچھ پتہ نہیں
کب تک ھم اپنے اَن کہے لفظوں کی کِرچیاں
فرشِ ھوا سے چُنتے رھے، کچھ پتہ نہیں!
شبنم کے ساتھ ساتھ جو چمکے تمام شب
تارے تھے وہ کہ عکس مِرے آنسوؤں کے تھے!
کیوں قُربتوں کے شور میں گُھٹنے لگا تھا دَم
قسمت کے تھے کہ حلقے تِرے بازوؤں کے تھے
کچھ پتہ نہیں ـــــــــ !
گرد اِس قدر ھے آئنہء ماہ و سال پر
خوابوں کے عکس اپنے خدوخال کھو گئے
آنکھوں کے رنگ لے گئی تاروں کی روشنی
چہروں کے نقش ریت کی تحریر ھو گئے
تکتے تھے دِل کی سمت جو قرنوں کی اَوٹ سے
بے نام خواھشوں کے وہ موسم بدل گئے
سُورج غروُب ھو گئے، مہتاب ڈھل گئے
اُس بے کنار ھجر کا دشتِ چمن نما
تمثالِ دشتِ کرب و بلا بن چُکا ھے اب
طائر شہید ھو چُکے، اشجار جل گئے
یہ سچ ھے لوحِ وقت پر تحریرِ موجِ رنگ
نقش و نگارِ آب کی صوُرت ھے برق پا
اک بار پُل تلے سے جو پانی گزر گیا
سمجھو کہ مر گیا
ساحل کا جھاگ ھو کہ مِٹے یا کہ رزقِ اَبر
آتا نہیں پلٹ کے کبھی، جو گیا ــــــــ گیا
لیکن یہ کیا کہ آج بھی جس رات ماہتاب
تاروں کے بے کنار میں رستہ نہ پا سکے
آنکھوں میں جھلملاتے ھُوئے آنسوؤں کے پار
مِلتی ھیں اِس طرح سے زمانوں کی سرحدیں
چلتا نہیں پتہ،
ھم پیچھے رہ گئے ھیں کہ آگے نکل گئے ـــــ !
(امجد اسلام امجد )
