روٹھا رہے مجھ سے یہ منظور ہے لیکن 

یارو اسے سمجھاؤ میرا شہر نہ چھوڑے

Barishain Naheen Rukteen !!

بارشوں کے موسم میں

تم کو یاد کرنے کی 

عادتیں پرانی ہیں 

اب کی بار سوچا ہے 

بارشوں کے موسم میں 

تم کو یاد کرنے کی 

عادتیں بدل ڈالیں

پھر خیال آیا کہ 

عادتیں بدلنے سے بارشیں نہیں رکتیں

بارشیں نہیں رکتیں !!! 

Ishq

عشق وہ رنگ ہے  قتیلؔ

بارشوں سے بھی جو نہیں جاتا

Zeest

پہلے شراب زیست تھی، اب زیست ہے شراب 

کوئی پلا رہا ہے، پئے  جا رہا ہوں میں

Sharab

ساقیا تشنگی کی تاب نہی 

زہر دے دے اگر  شراب نہیں

Sawan Main Ghabra Jata Hai

ساون میں گھبرا جاتا ہے 

دل میرا صحرا جاتا ہے 

الف سمجھ میں آجاوے تو 

 سب کچھ پڑھنا آ جاتا ہے 

برف کا اک اک آنسو پی کر 

دریا وجد میں آتا ہے 

اصل سفر ہے وہاں سے آگے 

جہاں تلک راستہ جاتا ہے 

لڑکی میلے میں تنہا تھی 

سوچ  کے دل بیٹھا جاتا ہے 

جب میں جنگل ہو جاتا ہوں 

مور ناچنے آ جاتا ہے 

شاید اس نے دستک سن لی 

دیکھو در کھلتا جاتا ہے 

نیند کے بین بجاتے ہی اشکؔ

 بستر میں سانپ آ جاتا ہے 

(پروین کمار اشکؔ)

December Ki Akhri Shab

آج دسمبر کی آخری شب میں 

شب تنہایی میں 

اپنے ٹیرس پہ کھڑی کافی دیر سے میں

چودھویں کے چاند کو دیکھ رہی تھی 

جس کی چاندنی میں 

میں بھیگ گئی تھی 

اتنی ڈوب گئی تھی

کہ مجھے خبر بھی نہ ہو سکی 

کہ کب 

اس نے میری بکھری زلفوں کو سمیٹا تھا 

اور!

چھپ  کے سے کانوں میں سرگوشی کی تھی

اپنی محبت کا اظہار کیا تھا 

مجھے عہد وفا میں باندھ کر گیا تھا 

وہ لمحہ اتنا حسین تھا 

کہ!

حیا سے میری پلکیں جھک سی گئی تھیں 

میں اپنے آپ میں سمٹ سی گئی تھی 

پچھلے سال دسمبر کی آخری شب ایسی ہی تھی 

اور آج بھی دسمبر کی آخری شب ہے 

اور میں 

یہ سوچ رہی ہوں کہ!!!

آج وہ کس کے ساتھ ہوگا...؟

کہ آج وہ...

 کس کواپنی وفا کا یقین دلا رہا ہوگا...؟؟

December

دسمبر ہوش  کر  پاگل یہ تجھ کو کیا  ہوا آخر 

بنا برسے چلے جانا تیری عادت نہ تھی پہلے 

بچپن کا دسمبر

ہاں مجھے یاد ہے 

بچپن کا وہ دسمبر

ٹھٹھرتی ڈھلتی شاموں میں 

آنگن کی دیوار سے سرکتی دھوپ 

جلتے ہوئے کوئلے کی مہک 

 اور میرے پھٹے ہوئے گالوں پر 

لکیریں بناتے 

وہ  جمے ہوئے آنسو...

آسمان پر جمتی، وہ بادلوں کی دھند دیکھ کر 

امی کا دروازے میں کھڑے ہو کر پکارنا 

اور ہم سب کا مٹی بھر کنچے سنبھال کر 

اپنے اپنے گھروں کو بھاگنا...

رات بھر چپ چپ کر 

آسمان کو دیکھ 

برف دیکھنے کی دعا کرنا 

اور صبح پھوٹتے ہی 

صحن میں گرتی برف کے ستارے چننا 

اور برف گراتے آسماں کو دیکھ دیکھ 

خود کو بھی برف کے گالوں کے ساتھ 

اڑتے ہوئے محسوس کرنا 

پھر تم آ گیئں...

اور بچپن کا دسمبر بیت گیا 

تب  پہروں اس سرکتی دھوپ تلے 

اور ان ٹھٹھرتی شاموں میں 

میں تمہاری ایک جھلک دیکھنے کے لئے 

آسماں سے گرتی برف کی چاندنی 

اپنے وجود پر سجاتا رہا اور 

زمین پر بچھی اس سفید چادر پر 

میرے قدموں کا ہر نشان 

تمہارے گھر کی دہلیز تک ہی جاتا رہا

پھر وو دسمبر بھی بیت گیا 

اور دیکھو...

میں اب بھی گلی کے اسی نکڑ پر کھڑا ہوں 

ٹھٹھرتی ڈھلتی شام بھی ہے 

پر سنہری دھوپ نہیں سرکتی 

وقت جیسے تھم سا گیا ہے 

برف کے ستارے میرے بالوں میں 

چاندنی بکھیر تو رہے ہیں 

پر انھیں بھگو نہیں پاتے 

یہ کیسی برفیلی شام ہے 

جس کی سردی میرے آنسو جما نہیں پا رہی 

جلتے کوئلوں کا دھواں 

آنکھ تو جلاتا ہے 

پر اس میں وہ  مہک نہیں ہے

اور دیکھو میرے گھر کا دروازہ...

پٹ کھولے کھڑا تو ہے لیکن 

امی کی ڈانٹ نجانے کہاں کھو گی ہے؟

تمہارے گھر کی طرف جاتے سبھی راستے 

اس قدر سنسان کیوں پڑے  ہیں؟

اس برفیلی شام میں

 اور

میرے بچپن کے دسمبر میں 

کتنا فرق ہے 

(ہاشم ندیم خان )